Hermanus Times-Kalfiefees Augustus 2004

BALLE
deur Saartjie Botha
met Nina Swart, Neels van Jaarsveld, Lorraine Burger en Altan Ungerer
Regie: Christine Truter

Op ‘n Vrydagaand om die pool-tafel verken twee jong paartjies hul verhoudings. Terwyl daar bier gedrink en bolangs geskerts en geklets word, woel die emosies. “Balle bied ‘n blik op die sosiale dinamiek van eietydse jong couples en hul eiesoortige onsekerheid rondom permanente verhoudings. Pool word ‘n bokskryt, word voorspel, is parodie,” lui die persverklaring. Balle is ook reeds by die KKNK en by die Volksbladfees opgevoer. Dit bied mense ook die geleentheid om met nuwe, jong akteurs kennis te maak. Nina Swart het al bekendheid verwerf as Willemien in die sepie 7de Laan, en wys wat sy op die verhoog kan doen, terwyl Neels van Jaarsveld ‘n Slurpie gewen het vir sy vertolking van Uys Krige in Die Goue Seun en in Spanner. Lorraine Burger was al te sien in die suksesvolle Raaiselkind en Altan Ungerer in Macbeth.

NIPPLE CAPS EN G-STRINGS
deur Deon Opperman
met Gigi
Regie: Deon Opperman

Dit is ‘n stuk vir volwassenes hierdie. Op die oog-af is dit ‘n ondersoek na seksualiteit erotika en sensuur in Suid-Afrika; na die lewe van ‘n ontkleedanseres, en dit kan vir sommige mense skokkend wees. Diegene wat egter die werk van Deon Opperman, een van Suid-Afrika se voorste dramaturge, ken, sal weet hy hou hom nie met ydel woorde besig nie. Nipple Caps en G-strings is dan ook baie meer as ‘n vertoning wat met die can-can begin en met ‘n kaal vrou op die verhoog eindig. “Dit is ‘n ernstige uitbeelding van ‘n onderwerp van uiterste relevansie vir elke mens,” lui die beskrywing van die dramaturg. En die rede vir hierdie relevansie is inderdaad die één ding waarmee alle mense spook, naamlik die liefde. Hoe eerlik is mense werklik in hul liefdes- en seksuele verhoudinge? Steek mense nie maar altyd iets vir mekaar weg nie en staan hulle dus nooit werklik naak voor mekaar nie. En wat gebeur as een van die twee in ‘n verhouding die dag besluit om eerlik en “kaal” te wees?

OP DIE VROU AF
met Pedro Kruger en Sarah Theron
Teksverwerking en regie: Hennie van Greunen
Geborg deur SARIE

Hierdie heerlike stukkie musiekteater is gegrond op André le Roux se vlymskerp en skreeusnaakse waarnemings in sy SARIE-rubriek Op die vrou af. Hierdie gewilde rubriek het al meninge paartjie laat dink: Maar dis mos óns daai! Nou het die veelbekroonde storieverteller Henne van Greunen ‘n klompie van dié draadsteek-geskrifte herinterpreteer vir die vehroog. En in dié realiteitsitkom vol kookwatermusiek is niemand minder nis as die vurige diva Sarah Theron (alias Baby Botha in Egoli) en die storieverteller, sanger, akteur, pianis en liedjieskrywer Pedro Kruger te sien. Venus en Mars? Ga! Vroue shop en pak te veel in, mans praat en dink te min. Viagra en Prozac! Ja, en veral die prozac is dalk agterna nodig vir die gehoor, want dit is werklik ‘n opwindende ervaring. Hierdie produksie was by die KKNK baie gou uitverkoop en talle feesgangers moes teleurgesteld omdraai. Bespreek dus vroeg.

K
deur Hennie van Greunen
met Trix Pienaar en Margit Meyer-Rödenbeck.
Regie: Hennie van Greunen

Die oumense het altyd van kanker gepraat as die groot K of die “siekte” omdat hulle dit nooit by die naam wou noem nie. Ja, hierdie stuk handel oor die groot K, maar lanklaas is hierdie onderwerp met soveel deernis, soveel insig en soveel humor benader. Gehore by die KKNK het geskater en as’t ware met ‘n gevoel van bevryding uitgestap. Trix Pienaar speel die rol van ‘n eksentrieke en bevryde vrou met terminale kanker wie se konserwatiewe dogter, Margit Meyer-Rödenbeck, teësinning huis toe kom na alles wat sy van weggevlug het. Maar sy kry meer as ‘n sterwende ma by die huis. Wel ‘n ma wat nog vol grappe is, wat haar prostetiese bors baie akkuraat as missiel kan gebruik en ‘n ma wat haar sitkamermuur met lirieke bekrap het. Dit is ‘n diep ontroerende ervaring om te sien hoe twee vroue mekaar vind nadat hul paaie uiteengeloop het, en op ‘n manier verloor die dood sy angel en die groot K sy angs. Nog selde het gehore hulle so meegeleef as met hierdie verhaal wat eintlik aan almal bekend is omdat so baie reeds die groot K beleef het, hetsy aan eie lyf of deur die lyding van ‘n geliefde. Dit is ‘n stuk wat niemand behoort te mis nie.

 

‘N AAND SAAM MET AMANDA – ‘N VUUR GESTEEL BY DIE GODE

Aan Amanda Strydom is daar nou geen keer nie. Sy het pas by die KKNK die SARIE-Kanna gewen vir die Afrikaanse vrou wat feesgangers die meeste geïnspireer het. Op die ouderdom van 48 het sy iets heeltemal nuuts fees toe gebring en behoorlik gerock in haar program Verspreide buie/Scattered Thunder. Verspreide buie is haar negende CD en het reeds twee Geraas-pryse gewen, naamlik vir beste solokunstenaar en beste volwasse kontemporêre album. Pas het sy ook die Suid-Afrikaanse Musiektoekenning gewen as die beste kontemporêre Afrikaanse kunstenaar. Haar program by die KKNK is deur SARIE geborg, wat ook ‘n bydrae tot haar optrede by die Kafiefees lewer.
Amanda Strydom sing met ‘n nuwe oorgawe en ‘n wasdom wat sorg dat elke emosie, elke nuanse ‘n mens so fyn op die oor val dat haar optrede ‘n belewenis word wat niemand gou kan vergeet nie. ‘n Bundel met haar liedtekste, Kaalvoet, het ook pas by genugtig! verskyn en bevat van die beste lirieke van haar loopbaan.
In sy nawoord in hierdie bundel skryf Hennie Aucamp: “Vriende, ek nooi u om ‘n glasie wyn op Amanda Strydom te klink. Kantel die glasie teen die lig en kyk mooi: die wyn hou, soos Amanda self, ‘n vuur gevange. ‘n Vuur gesteel by die gode.”
 

Sussie is nou suur
met Marion Holm
Regie: Hennie van Greunen

Mense word vooraf gewaarsku: Moenie hierdie produksie kom bywoon as jy blaasprobleme het nie, want Holm se stories en sketse is humor op sy beste, veral goeie Afrikaanse humor. Sy laat die gehoor van die begin af skaterlag. Holm is bekend vir haar deelname aan die Casper Rasper Snow en Haak & Steek. Saam met Pedro Kruger het sy ook op die verhoog verskyn in Anna se engel en in Jong Dames Dinamiek saam met Margit Meyer-Rödenbeck ( ofte wel Dowwe Dolla). Laasgenoemde speel ook saam met Trix Pienaar in K.

Die Kaapse Filharmoniese Orkes

Die Kaapse Filharmoniese Orkes kom vir die eerste keer oorkant die berg speel en dit is dus ‘n besondere voorreg wat niemand moet misloop nie. Die Filharmoniese Orkes is een van die spogprodukte van die Kaap. Dit is in die begin van 2001 gestig nadat Kaapstad se vorige orkes ontbind het. Sedertdien het die orkes ‘n baie goeie reputasie opgebou en het dit tot 100 konserte ‘n jaar met van die voorste plaaslike en internasionale dirigente en soliste.
In ‘n program van sowat 70 minute gaan die orkes by die Kalfiefees werke speel van Grieg, Smetana, Bizet, Wagner, Tsjaikofski en Von Suppe. Die volledige program sal later aangekondig word.
 

Boy from Bethulie
met Patrick Mynhardt

Dit was verlede jaar vyftig jaar dat die nou 71-jarige Patrick Mynhardt sy akteursloopbaan begin het. Sedert daardie tyd het hy in letterlik honderde produksies, rolprente en TV-prente opgetree, en nie net in Suid-Afrika nie, maar ook in twee
West End-produksies en verskeie internasionale rolprentproduksies. Hy het op verskeie plekke in Europa, Amerika en selfs in Israel opgetree. In Suid-Afrika het hy in die afgelope paar dekades veral bemind geraak weens sy vertolking van die verhale van Herman Charles Bosman. Boy from Bethulie vertel die verhaal van die jong Mynhardt se reis van sy geboortedorp tot die internasionale verhoog en verder. Hy kan spog met al die mense wat hy geken het, al die ervaringe wat hy gehad het, maar dit is in die laaste instansie ‘n reis na binne wat hy met kenmerkende eerlikheid en humor onderneem. Boy form Bethulie is ook pas in boekvorm uitgegee deur Wits University Press.

Hermanus Times KALFIEFEES
6 tot 9 Augustus 2004